मराठी साहित्य परिषदेचा राज्यस्तरीय उत्कृष्ट शाखा पुरस्कार या शाखेला

नागेश गायकवाड--- मराठी साहित्य क्षेत्रात सातत्यपूर्ण सक्रिय असलेल्या येथील मराठी साहित्य परिषद शाखेला राज्यस्तरीय उत्कृष्ट शाखा पुरस्कार आज जाहीर झाला. या शाखेने गतवर्षी _एक लाख पुस्तक वाचन आणि आकलन" या राबवलेल्या उपक्रमाची मराठी साहित्य परिषदेने दखल घेतली. आटपाडीला मराठी साहित्य आणि साहित्याची मोठी परंपरा आणि वारसा लाभलेला आहे. आटपाडीने अखिल भारतीय मराठी साहित्य संमेलनाला ग. दि. माडगूळकर, व्यंकटेश माडगूळकर, ना.स. इनामदार, डॉ. शंकरराव खरात यांच्या रूपाने साहित्य संमेलनाला अध्यक्ष दिलेत. त्यांच्यानंतरच्या कालखंडात मराठी साहित्य लेखनाची परंपरा आटपाडीने कायम जोपासली आहे. नवोदित लेखकांना प्रोत्साहन देण्याच्या दृष्टीने आणि त्यांचे पुस्तके प्रकाशित करण्याच्या दृष्टीने आटपाडीत मराठी साहित्य परिषदेची शाखा गेली 25 वर्षे अखंडपणे सुरू आहे. आटपाडी तालुका मराठी साहित्य परिषदेच्या शाखेचे अध्यक्ष अमरसिंह देशमुख आहेत. ते शाखेच्या माध्यमातून दरवर्षी मराठी साहित्य संमेलनाचे अध्यक्ष पद भूषवलेल्या लेखकाचे व्याख्यान आयोजित करतात. याशिवाय लहान मोठी साहित्य संमेलने होतात. तसेच मराठी साहित्य परिषदेच्या येथील शाखेने तालुक्यातील नवोदित साहित्यिकांची पुस्तके प्रकाशित केले आहेत. गतवर्षी मराठी साहित्य परिषदेच्या येथील शाखेने "एक लाख पुस्तक वाचन आणि आकलन" उपक्रम राबवला होता. या उपक्रमामध्ये देशभरातून आणि परदेशातून मराठी वाचकांनी सहभाग घेतला होता. अवघ्या अकरा महिन्यांमध्ये एक लाख पुस्तके वाचून त्याच्या नोंदी केलेल्या वही शाखेकडे जमा केल्या होत्या. त्याची दखल घेऊन मराठी साहित्य परिषदेने परिषदेच्या 118 व्या वर्धापन दिनानिमित्त उत्कृष्ट शाखा पुरस्कार म्हणून आटपाडी शाखेला जाहीर केला आहे.