गुरुवारी कळणार आटपाडी बाजार समितीचा कारभारी

 आटपाडी ता.१६-आटपाडी कृषी उत्पन्न बाजार समितीच्या सभापतीची निवड गुरुवार ता. 18 मे रोजी होणार आहे. सत्ताधारी आणि विरोधी गटाने समान नऊ जागा मिळवल्याने निवडीत बाजी कोण मारणार?, या कडे  तालुक्याचे लक्ष लागले आहे.        आटपाडी कृषी उत्पन्न बाजार समितीची निवडणूक अत्यंत अटीतटीची आणि चुरशीची झाली होती. बाजार समितीची सत्ता आजपर्यंत माजी आमदार राजेंद्रअण्णा देशमुख यांच्याकडे राहिली होती. यावेळी माजी आमदार श्री. देशमुख, आमदार गोपीचंद पडळकर आणि राष्ट्रवादी काँग्रेसचे तालुकाध्यक्ष हणमंतराव देशमुख यांच्या नेतृत्वाखाली भाजप आणि राष्ट्रवादीने आघाडी करून लढवली होती. तर त्यांना जिल्हा बँकेचे संचालक तानाजीराव पाटील यानी काँग्रेसचे जयदीप भोसले आणि रासपचे लक्ष्मण सरगर यांना सोबत घेऊन शिंदे गटाची शिवसेना, काँग्रेस आणि रासप अशी आघाडी करून सत्ताधाऱ्यांना तगडे आव्हान दिले होते. या निवडणुकीत सत्ताधारी गटाला नऊ आणि विरोधकांना नऊ अशा समान जागा मिळाल्या. निवडून आलेले सदस्य अत्यंत कमी मताच्या दोन, पाच, सात, दहा या फरकाने निवडून आले आहेत. निकाल लागल्यानंतर दोन्ही गटाला समान जागा मिळाल्याने त्याच दिवशी नूतन संचालकांना अज्ञात स्थळी हलवले आहे. दोन्ही गटाला सदस्य फुटाफुटीची भीती असल्यामुळे दक्षता घेतली आहे. बाजार समितीच्या सभापती आणि उपसभापतीची निवड गुरुवार ता. 18 मे रोजी होणार आहे. या निवडीची उत्सुक शिगेला पोचली आहे. सभापती आणि उपसभापतीची नावे कोणीच जाहीर केलेली नाहीत. नावाची गुप्तता पाळली आहे. निवडीत कोण बाजी मारणार?, मतदान होणार का? झाले तर गुप्त की उघड होणार?, समान मते पडल्यास निवड कशी होणार?, याकडे लोकांचे लक्ष लागले आहे.