माजी मंत्री महादेव जानकर यांनी शिलेदारासाठी वाडीवस्ती पिंजून काढली

आटपाडी ता. ४-आटपाडी तालुक्यातील जिल्हा परिषदेच्या निवडणुकीचा आखाडा आता चांगलाच तापला असून, आपल्या एकनिष्ठ सहकाऱ्यांच्या विजयासाठी माजी मंत्री आणि राष्ट्रीय समाज पक्षाचे अध्यक्ष महादेव जानकर यांनी कंबर कसली आहे. आपल्या शिलेदारांना जिल्हा परिषदेत पाठवण्यासाठी त्यांनी तालुक्यातील गावे आणि वाड्यावस्त्या पिंजून काढल्या असून, एका माजी मंत्र्याची आपल्या कार्यकर्त्यासाठीची ही धडपड पाहून मतदार अक्षरशः भारावून गेले आहेत .                              *रासपाच्या उमेदवारांसाठी मैदानात*

खरसुंडी जिल्हा परिषद गटातून सत्यवान गलांडे, दिघंची गटातून संदेश खटके आणि करगणी गटातील रासपाचे उमेदवार निवडणूक लढवत आहेत. या उमेदवारांच्या प्रचारार्थ जानकर यांनी स्वतः मैदानात उतरून मतदारांच्या गाठीभेटी घेतल्या. "प्रामाणिक कार्यकर्त्यांना संधी द्या," असे आवाहन त्यांनी यावेळी केले.

वाड्यावस्त्यांवर थेट संवाद:

महादेव जानकर यांनी आपल्या दौऱ्यात तळेवाडी, काळेवाडी, हिवतड, मानेवाडी, मेटकरवाडी, गोमेवाडी, अर्जुनवाडी, लेंगरेवाडी, मासाळवाडी, आंबेवाडी, बोबेवाडी, पुजारवाडी, राजेवाडी आणि लिंगीवरे यांसह अनेक गावांचा दौरा केला. या दौऱ्याचे वैशिष्ट्य म्हणजे त्यांनी केवळ सभा न घेता प्रत्यक्ष वाड्यावस्त्यांवरील ज्येष्ठ मेंढपाळ, महिला, भगिनी आणि तरुण-तरुणींशी जिव्हाळ्याचा संवाद साधला*.               कार्यकर्त्यांच्या घरी जाऊन बांधली मोट*

प्रत्येक गावातील प्रमुख सामाजिक कार्यकर्त्यांच्या घरी जाऊन जानकर यांनी सविस्तर चर्चा केली. राज्याचे मंत्रिपद भूषवलेला एक मोठा नेता थेट सामान्य मतदाराच्या दारात येऊन संवाद साधत असल्याने मतदारांमध्ये उत्साहाचे वातावरण निर्माण झाले आहे. जागोजागी त्यांचे औक्षण करून आणि फटाक्यांच्या आतषबाजीत उत्स्फूर्त स्वागत करण्यात आले.

या दौऱ्यामुळे आटपाडी तालुक्यातील जिल्हा परिषदेच्या निवडणुकांमध्ये राष्ट्रीय समाज पक्षाने मोठी आघाडी घेतल्याचे चित्र दिसत असून, जानकरांच्या या 'फिल्डिंग'मुळे विरोधकांचे धाबे दणाणले आहेत.