आटपाडी तालुक्यात धनगर समाजाची लोकसंख्या मोठी आहे. पिढ्यानपिढ्या मेंढपाळी आणि शेती हाच या समाजाचा मुख्य आधार राहिला आहे. मात्र, बदलत्या काळानुसार समाजातील तरुण वर्गाने शिक्षणाचे महत्त्व ओळखले आहे. केवळ पदव्या न घेता, हा तरुण वर्ग आता सामाजिकदृष्ट्या जागरूक झाला असून प्रशासकीय सेवा, अभियांत्रिकी, वैद्यकीय आणि व्यावसायिक क्षेत्रांत स्वतःचा ठसा उमटवत आहे.
उद्योजकतेचे नवे क्षितिज:
तालुक्यातील अनेक तरुणांनी केवळ नोकरीवर अवलंबून न राहता स्वतःचे उद्योग सुरू केले आहेत. अनेक तरुणांनी मोठ्या शहरांत जाऊन शून्यातून विश्व उभे केले असून आज ते मोठ्या उद्योग साम्राज्याचे मालक आहेत. विशेषतः गलाई व्यवसायात आणि इतर व्यापारी क्षेत्रांत आटपाडीच्या धनगर तरुणांनी मिळवलेले यश कौतुकास्पद आहे.*समाजाचे देणं लागते ही भावना*
या प्रगतीचे सर्वात महत्त्वाचे वैशिष्ट्य म्हणजे, आर्थिक स्थैर्य लाभल्यानंतरही हे तरुण आपल्या मातीला विसरलेले नाहीत. "समाजाचे आपण काहीतरी देणं लागतो" या उदात्त भावनेतून ही तरुण पिढी समाजात जनजागृती करण्याचे काम करत आहे. अंधश्रद्धा निर्मूलन, शिक्षणाचा प्रसार आणि समाजातील अनिष्ट प्रथांविरुद्ध ही पिढी आता खंबीरपणे उभी ठाकली आहे.
*उज्वल भविष्याची नांदी*
शिक्षणाने आलेली वैचारिक प्रगती आणि उद्योजकतेतून आलेली आर्थिक सुबत्ता यामुळे धनगर समाजाचे भविष्य खऱ्या अर्थाने उज्वल दिसत आहे. आटपाडीच्या या 'कोहिनूर' हिऱ्यांच्या कार्यामुळे संपूर्ण तालुक्याचा नावलौकिक वाढत असून, ही बदलाची लाट इतर समाजांसाठीही प्रेरणादायी ठरत आहे.
टिप्पण्या
टिप्पणी पोस्ट करा