आटपाडीचा महसूल विभाग "ॲक्शन मोडवर", एकाच रात्री तीन वाहनावर केली कारवाई

 

 आटपाडी ता.6- माणगंगा नदी पात्रातून वाळूची चोरी करून त्याची वाहतूक करताना बोबेवाडी ते माडगूळ रस्त्यावर दोन ट्रॅक्टर आणि एका टेम्पोवर आटपाडी महसूल विभागाने कारवाई केली. या कारवाईत तीनही वाहने आणि त्यामधील चार ब्रास वाळूचा साठा जप्त केला आहे.                                                    बोबेवाडी येथून जाणाऱ्या माणगंगा नदी पात्रातून मोठ्या प्रमाणात वाळूची तस्करी केली जाते. याकडे प्रशासनाचे नेहमीच दुर्लक्ष झालेले आहे. इथे होणाऱ्या वाळू तस्करीच्या अनेक तक्रारी मुख्यमंत्र्यापर्यंत पोहोचल्या आहेत तरीही नदीतील वाळू चोरी थांबवण्यात महसूल प्रशासनाला अपेक्षित यश मिळवता आलेले नाही.                                      सध्या आटपाडी महसूल विभाग ॲक्शन मोडवर आला आहेत. आटपाडीच्या तहसीलदार बी.एस. माने यांच्या आदेशाने आटपाडीचे तलाठी सुधाकर केंगार यांच्या नेतृत्वाखाली असलेल्या पथकाने मध्यरात्री बोंबेवाडी ते माडगूळ रस्त्यावर वाळूची वाहतूक करणाऱ्या तीन वाहनावर कारवाई केली.  हे पथक माणगंग नदी पात्र परिसर, बोबेवाडी आणि माडगळे परिसरात मध्यरात्री गस्त घालत होते. माणगंगा नदीपात्रातून वाळू भरून वाहने येत असल्याची  या पथकाला गुप्त खबर लागली होती. माडगूळ रस्त्यावर या पथकाने पहिल्यांदा समोरून आलेला ट्रॅक्टर थांबवला. त्यात या पथकाला वाळू आढळून आली. त्यानंतर टेम्पो आणि नंतर ट्रॅक्टर पथकाला सापडला. रात्री गस्त घालत असताना त्यांना दोन ट्रॅक्टर आणि एक टेम्पो वाळूची वाहतूक करताना सापडली. ही कारवाई पहाटेपर्यंत सुरू होती. महसूल पथकाच्या या कारवाईने वाळू तस्कराची मध्यरात्रीची पळापळ आणि धावपळ चालली होती. यातील बोंबेवाडी येथील गणेश बाबासाहेब पवार यांच्या मालकीचा नंबर नसलेला ट्रॅक्टर वाळूसह जप्त केला आहे. बोंबेवाडी येथीलच महेश बाळासाहेब कारंडे यांचा नंबर नसलेला टेम्पो आणि दोन ब्रास वाळूसह प्रशासनाने ताब्यात घेतला आहे. तर आंबेवाडी येथील विष्णूचंद्र मेटकरी यांच्या मालकीचा नंबर नसलेला ट्रॅक्टर ट्रॉली आणि त्यातील वाळू जप्त केले आहे. महसूल विभागाने वाळू तस्करावर कारवाईचा बडगा उभारल्याने तस्करात खळबळ उडाली आहे. महसूल विभागाने कारवाईत सातत्य ठेवावे, अशी नदीकाठच्या शेतकऱ्यांची अपेक्षा आणि मागणी आहे.