पारेकरवाडी ग्रामपंचायत मुलीच्या नावाने सुकन्या समृद्धी योजनेत चार हजार टाकणार

आटपाडी ता.29- पारेकरवाडी ता. आटपाडी ग्रामपंचायतीने गावातील वर्षभरात जन्माला येणाऱ्या प्रत्येक मुलींच्या नावाने प्रत्येकी चार हजार रुपये "सुकन्या समृद्धी योजनेत" टाकण्याचा  ऐतिहासिक निर्णय मासिक बैठकीत घेतला आहे. बैठकीच्या अध्यक्षस्थानी सरपंच सुवर्णा कोकरे होत्या. ग्रामपंचायतीने घेतलेल्या या निर्णयाचे उपक्रमाचे तालुक्यातून कौतुक केले जात आहे.                                          ग्रामीण भागात मुलीच्या जन्मानंतर अजूनही काही पालकात नाराजी पसरते. मुलगी ही पालकांना ओझं वाटते. मुलीचे शिक्षण आणि विवाहाचा खर्च याच सर्वात मोठा कोडे पालकाच्या समोर असतात. त्यामुळेच पारेकरवाडी ग्रामपंचायतीने मुलीच्या विवाहाचे ओझे पालकावरचे कमी व्हावे आणि मुलीच्या जन्माचे स्वागत करावे या हेतूने वर्षभरात गावात नवीन जन्माला येणाऱ्या मुलीच्या नावाने "सुकन्या समृद्धी योजनेत" चार हजार रुपये टाकण्याचा ऐतिहासिक निर्णय ग्रामपंचायतच्या मासिक बैठकीत सर्व सदस्यांनी घेतला आहे सभेच्या अध्यक्षस्थानी सरपंच सुवर्णा कोकरे होत्या. त्यांच्या संकल्पनेतून हा उपक्रम राबवला जाणार असून एक जानेवारीपासून जन्माला आलेल्या प्रत्येक मुलीच्या नावावर ग्रामपंचायत चार हजार रुपये जमा करणार आहे. हे पैसे "सुकन्या समृद्धी योजनेत" गुंतवले जाणार आहे. मुलीच्या अठरा वर्षानंतर ते काढता येणार आहेत. तसा मासिक सभेच्या बैठकीत एकमताने निर्णय घेतला आहे. यावेळी उपसरपंच मयुरी पारेकर, सदस्य प्रकाश बरकडे, आबासाहेब कोकरे, प्रकाश हांडे, नारायण कोकरे, विश्वनाथ बाबर आणि ग्रामसेवक सतीश जाधव प्रमुख उपस्थित होते.