आटपाडी तालुक्यातील 'या'शाळेला तीन वर्षे शिक्षक नसल्यामुळे पालकांनी आज शाळाच उघडली नाही

आटपाडी--पांढरेवाडी येथील जिल्हा परिषद शाळेला सतत मागणी करूनही रिक्त असलेल्या जागी शिक्षक दिला जात नसल्यामुळे आणि मॉडेल स्कूल अंतर्गत मंजूर झालेल्या नवीन खोल्याचे बांधकाम सुरू केले जात नसल्यामुळे संतप्त पालकांनी आज शाळेला टाळे ठोकले. यामुळे शिक्षण विभागाच्या अधिकाऱ्यांची धावपळ उडाली. अधिका-यांनी दोन दिवसात शिक्षक देण्याचे आश्वासन दिल्यानंतर दुपारनंतर शाळा सुरू झाली.                                                          याबाबत अधिक माहिती अशी की, आटपाडी अंतर्गत पांढरेवाडीची वस्ती येते. तिथे जिल्हा परिषदेची पहिली ते सातवीपर्यंतची शाळा आहे. यामध्ये 90 विद्यार्थी आहेत. त्यांना शिकवण्यासाठी शिक्षकांच्या पाच जागा आहेत. पैकी दोन जागा गेली तीन वर्षे रिक्त आहे तर एका जागेवर मुख्याध्यापक असून त्यांच्याकडे केंद्रप्रमुख पदाचा अतिरिक्त भार आहे. त्यांच्याकडे केंद्रप्रमुख आणि मुख्याध्यापक पदाची जबाबदारी असल्यामुळे त्यांना ज्ञानदानासाठी वेळ मिळत नाही. सहाजिकच दोन शिक्षकांवरच पाच वर्गाची जबाबदारी आहे. एका शिक्षकाला दोन वर्ग एकाच खोलीत एकत्र करून शिकवावे लागत आहे. रिक्त जागेमुळे विद्यार्थ्यांचे शैक्षणिक नुकसान होत असल्याची पालकांनी यापूर्वी अनेक तक्रारी केल्या आहेत. या तक्रारीची दखल घेतली जात नव्हती. तसेच या शाळेसाठी नवीन खोल्या मंजूर झाल्या असून त्याची निविदा प्रक्रिया पूर्ण होऊन बरेच दिवस झाले पण काम सुरू केले जात नाही. जुन्या खोल्यांचे नेर्लेखन करून पाडल्या आहेत. मात्र नवीन खोल्याचे बांधकाम सुरू केलेले नाही. स्थानिक एका ग्रामस्थांनी बांधकाम विभागाकडे तक्रार केली आहे. या तक्रारीचा तात्काळ निपटारा करून शाळेचे बांधकाम सुरू करावे, अशी शालेय व्यवस्थापन समिती आणि पालकांची मागणी होती. त्याची दखल घेतली जात नसल्याने संतप्त झालेल्या पालकांनी शाळेवर थेट मोर्चा काढला. त्यांनी शाळेची कुलपे काढून दिली नाहीत. गट शिक्षण अधिकारी दत्तात्रय मोरे यांनी भेट देऊन पालकांशी चर्चा केली आणि दोन दिवसात शिक्षक देण्याचे आश्वासन दिल्यानंतर दुपारनंतर शाळा सुरू झाली.