आटपाडीत साद्य फाउंडेशनकडून आशा सेवेकेंचा गौरव

आटपाडी - ग्रामीण भागात सामान्य नागरिक आणि आरोग्य यंत्रणा यांच्यातील महत्त्वाचा दुवा असलेल्या आशा सेविकांचा सन्मान येथील साध्य फाउंडेशनने केला. साध्य फाउंडेशनच्या संस्थापिका ॲड. विद्याताई मोटे यांच्या संकल्पनेतून आणि पुढाकाराने आटपाडी तालुक्यातील आशा सेविकांना खास त्यांच्याच जीवनावर बनवलेला 'आशा' हा प्रेरणादायी चित्रपट दाखवला.

यावेळी तालुका वैद्यकीय अधिकारी डॉ. सौ. साधना पवार, विजय देवकर आणि आरोग्य विभागातील इतर मान्यवर उपस्थित होते.

आरोग्य विभागातील शेवटचा घटक असूनही तळागाळातील लोकांपर्यंत शासकीय योजना आणि आरोग्य सेवा पोहोचवण्याचे कठीण काम आशा सेविका करत असतात. त्यांच्या याच कामाची दखल घेऊन त्यांना प्रोत्साहन देण्यासाठी नुकताच प्रदर्शित झालेला आणि त्यांच्याच जीवनावर आधारित 'आशा' हा सिनेमा दाखवण्यात आला.

याप्रसंगी बोलताना साध्य फाउंडेशनच्या अध्यक्ष ॲड. विद्याताई मोटे यांनी "आशा सेविका या ग्रामीण आरोग्य व्यवस्थेचा कणा आहेत. त्यांच्या कार्याचा गौरव करणे हे समाजाचे कर्तव्य असल्याचे प्रतिपादन केले.  तालुका वैद्यकीय अधिकारी डॉ. साधना पवार यांनीही आशा सेविकांच्या कामाचे कौतुक करून या उपक्रमाबद्दल साध्य फाउंडेशनचे आभार मानले.

या आगळ्यावेगळ्या सन्मानामुळे तालुक्यातील आशा सेविकांनी आनंद आणि समाधान व्यक्त केला. तसेच चित्रपट पाहून आपल्याला कामाप्रती नवी ऊर्जा मिळाल्याची भावना व्यक्त केली. या कार्यक्रमाला तालुक्यातील आरोग्य विभागातील कर्मचारी आणि मोठ्या संख्येने आशा सेविका उपस्थित होत्या.