विद्या मोटे यांच्यासाठी लाडक्या बहिणींची वज्रमूठ; तरुणाईच्या सहभागामुळे परिवर्तनाचे वारे

आटपाडी ता. 1- संपूर्ण जिल्ह्याचे लक्ष लागून राहिलेल्या निंबवडे जिल्हा परिषद गटात राजकीय वातावरण पूर्णपणे ढवळून निघाले असून, शिवसेनेच्या उमेदवार विद्या मोटे यांच्या पाठीशी महिला, सुशिक्षित मतदार आणि युवक मोठ्या ताकतीने उभे राहिल्याचे चित्र आहे. या गटातील प्रचाराची धुरा खुद्द महिला आणि तरुणांनीच आपल्या खांद्यावर घेतल्याने यंदा निंबवडे गटात ऐतिहासिक परिवर्तन अटळ मानले जात आहे.

विद्या मोटे यांनी गेल्या चार वर्षांपासून निंबवडे गटात विविध सामाजिक उपक्रम आणि जनजागृतीच्या माध्यमातून मोठी चळवळ उभी केली आहे. त्यांच्या या कार्याचा प्रभाव तरुणांवर आणि महिलांवर मोठ्या प्रमाणावर पडला असून, त्याचाच सकारात्मक परिणाम या निवडणुकीत दिसून येत आहे. गटातील दिशा भरकटलेल्या तरुणांना प्रबोधनातून योग्य वाट दाखवण्याचे काम मोटे यांनी केले, ज्यामुळे आज सुशिक्षित युवक त्यांच्या प्रचारात अग्रभागी आहेत*लाडक्या बहिणींचा उत्स्फूर्त सहभाग*

या निवडणुकीचे सर्वात मोठे वैशिष्ट्य म्हणजे, सांगली जिल्ह्यात सर्वाधिक महिलांची गर्दी विद्या मोटे यांच्या प्रचारात पाहायला मिळत आहे. विशेषतः सर्वसामान्य कुटुंबातील महिला आणि मेंढपाळ समाजातील महिलांनी विद्या मोटे यांना आपली हक्काची 'लाडकी बहीण' मानून परिवर्तनाची चळवळ हाती घेतली आहे. 'आमची बहीण, आमचा उमेदवार' अशी भूमिका घेत या महिला घराघरांत जाऊन मोटे यांच्या विधायक कार्याचा प्रचार करत आहेत.

तरुणांच्या हातात निवडणुकीची सूत्रे

केवळ घोषणाबाजी न करता, विधायक भूमिकेतून समाजकारण करणाऱ्या विद्या मोटे यांच्यासाठी युवक वर्ग स्वतःहून मैदानात उतरला आहे. निंबवडे गटातील मतदारांचा कल पाहता, सर्वसामान्य जनतेनेच ही निवडणूक आता हातात घेतली आहे. सुशिक्षित मतदार आणि जागृत महिला शक्तीच्या जोरावर विद्या मोटे मुसंडी मारणार, अशी चर्चा आता संपूर्ण आटपाडी तालुक्यात रंगू लागली आहे