आटपाडीच्या माळावर कापूस डोलू लागला

आटपाडी - पांढऱ्या सोन्यासाठी कधीकाळी प्रसिद्ध असलेल्या आटपाडी तालुक्यात यंदा एकतपा नंतर दीड ते दोन हजार एकर क्षेत्रावर कापसाची लागवड झाली आहे. त्यामुळे यंदापासून आटपाडीच्या बाजारपेठेला कापसाचे गतवैभव मिळण्याची आशा निर्माण झाली आहे.                                    सांगली जिल्हात एकमेव आटपाडी तालुक्यात अत्यंत चांगल्या आणि लांब धाग्याचा कापूस पिकत होता. दर्जेदार कापूस उत्पादनासाठी आटपाडीचा नावलौकिक होता. तालुक्यात १९९० पासून लागवडीची सुरूवात झाली होती. शेतकरयांना हमखास पैसे देणारे पिक असल्यामुळे अल्पावधीत लागवडीचे क्षेत्र वाढले. आटपाडीच्या बाजारपेठा कापसाने गजबजल्या होत्या. बेळगांव,आथणी, विजापूर या भागातून कापूस खरेदीसाठी व्यापारी तळ ठोकूनच असायचे. रोज पाच पंचवीस ट्रक भरून कापूस पर राज्यात जात होता. आटपाडी, करगणी, खरसुंडी, दिघंची आणि झरे गावचे आठवडा बाजार कापसाच्या बाजारपेठेसाठी प्रसिद्ध झाले होते. साधारण तीन महिने कापसाचा हंगाम चालू राहायचा. तिथे मोठी आर्थिक उलाढाल होत होती. 2010 ते 12 दरम्यान कापसाचे बोगस बियाणे लागल्यामुळे त्यावर्षी कसलेच उत्पादन निघाले नाही. कापसाची लागवड मोठ्या क्षेत्रावर झाली होती मात्र बोगस बियाणाचा शेतकऱ्यांना फटका बसला. तज्ञ अभ्यासकांनी भेटी देऊन बोगस बियाणाबरोबरच वाढत चाललेले तापमानामुळे उत्पादन निघाले नसल्याचा निष्कर्ष काढला होता. त्यावेळी बोगस बियाणाचा विषय प्रचंड गाजला. शेतकऱ्यांनी मोर्चे काढले. तेव्हापासून कापूस लागवड पूर्ण ठप्प झाली. बोगस बियाणामुळे कापूस लागवडीचे शेतकरी धाडस करत नव्हते. मात्र गेल्या वर्षीपासून कृषी विद्यापीठाने शेतकऱ्यांना चांगल्या दर्जाचे कापूस बियाणाचा थेट पुरवठा सुरू केल्यामुळे कापूस लागवड केली जाऊ लागली आहे. गेल्या वर्षी नाममात्र दोनशे एकर क्षेत्रावर प्रायोगिक तत्त्वावर  नवीन बियाणाची लागवड केली होती. ती यशस्वी झाल्यामुळे यंदा दीड ते दोन हजार एकर क्षेत्रावर कापसाची लागवड झाली आहे. बाजार समितीच्या माध्यमातून हजार ते बाराशे एकर क्षेत्रावर बियाणे पुरवले आहे तर इतर शेतकऱ्यांनी थेट विद्यापीठातून बियाणे खरेदी केले आहेत. सध्या कापसाची लागवड होऊन तीन ते साडेतीन फूट उंच कापूस झाला आहे. निकोप कापसाची वाढ झाली आहे. तसेच मोठ्या संख्येने कापसाचे बोंडे ही आली आहेत. लवकरच प्रत्यक्ष कापसाचे उत्पादन सुरू होणार आहे.  एक तपानंतर आटपाडी तालुक्यात कापूस फुलताना दिसू लागला आहे.                                        फोटो-१) आटपाडी तालुक्यात यंदा शेतकऱ्यांनी लागवड केलेला कापूस.